MUME AUA MKEWE.KISA KWA KUPIKA UGALI MWINGI

Na timu ya Blog Kagera MWANAMKE aliyejulikana kwa jina la Reticia Protus (22) mkazi wa kitongoji cha Omurungu, Kata ya Minziro, Wilaya ya Missenyi, mkoani Kagera, ameuawa kikatili kwa kukatwakatwa mapanga sehemu mbalimbali za mwili wake na mumewe, kwa sababu ya kupika ugali mwingi. Kamanda wa Polisi Mkoa wa Kagera, Henry Salewi, alithibitisha kutokea kwa tukio hilo na kumtaja mtuhumiwa kuwa ni Rutashobya Muyo, mkazi wa Minziro, wilayani humo. Alisema Muyo alitenda kosa hilo Machi 12, mwaka huu majira ya saa 4 asubuhi katika eneo la kitongoji cha Omurungu. Kamanda Salewi alidai mtuhumiwa alichukizwa na tabia ya mke wake kupika chakula kingi ndipo alipochukua panga na kuanza kumkata sehemu mbalimbali za mwili. Hata hivyo, Kamanda Salewi alisema baada ya mtuhumiwa kutenda kosa hilo alitoweka na kwenda kusikojulikana, hali iliyosaidia marehemu kupata mwanya wa kukimbilia kwa kaka yake, John Protus, huku akilia na kusema mumewe anamuua. Aidha, Salewi alisema kuwa kaka wa marehemu kwa kushirikiana na majirani waliamua kumkimbza hospitali kwa matibabu lakini kabla hawajafika alifariki dunia.